صباح الخير لو كنتوا بتشوفوا الموضوع الصبح
ومساء الخير للى هايشوفه بالليل
الموضوع يا جماعة يتلخص فى كلمة واحدة
" التناااااااكة "
اكيد كلنا فى حياتنا صادفنا ناس وقولنا عليهم " تنكين "
ولو مصادفتوش يبئا من حسن حظكم
تعالوا نتفق الاول ان " التنااااكة " دى انواع
اسألونى انا اصلى تقريبا اتعاملت
مع كل انواع " التناكة " اللى فى الدنيا
النوع الاول : تناكة النظافة
تلاقى الواحد من دول وانت واقف معاه فى امان الله
لو بس عدت من جنبه تراباية صغيرة قد كده
ولمحها بطرف عينه
يركبه مليون عفريت ووشه يقلب على وش سلندر
وحواجبه تتشقلب وترسم تشكيله عجيبة
من السبعات والتمنيات
ويقعد ينفخ ويأفأف فى وشك
ويلعن الحظ اللى خلاه يعيش فى بلد زى دى
كلها تراب وتلوث (ياااااااى)
يخليك تكره حياتك وانت واقف معاه
النوع التانى بئا : تناكة المظهر والجمال
ده بئا يصحى من نومه يبص فى المرايا
يلاقى ربنا أكرمه بشوية حلاوة كده و طول بعرض
تلاقيه ماشى بيقول يا ارض اتهدى ما عليكي قدى
لأ ولو بنت عدت من جنبه يروح باصص لها بتناكة
ويدور وشه الناحية التانية
تقولش يعنى لو ساب وشه ناحيتها البنت هتعاكسه
ولا هيغم عليها من كتر حلاوته
مع انها اصلا ممكن تكون حلاوته موعت نفسها
وهو رحمها لما دور وشه بعيد
النوع التالت : تناكة الفلوس والمنظرة
ده بئا عادة هتلاقيه اهله كانوا شحاتين
وبعدين جت لهم فرصة تجارة مخدرات حلوة
وسبحان الله فى ظرف يومين بقوا رجال اعمال
وعندهم عربيات وبيروحوا النادى
وبقدرة قادر بعد ماكان بيقول آبا وآما بئا يقول مامى ودادى
ده بئا هتلاقيه طول ماهو بيتكلم
بيحكى عن الشاليه بتاعهم اللى فى مارينا
والعربية السوبر موديل اللى دادى جابها له
مخصووووووووص من ألمانيا
وتلاقيه نص كلامه أوامر والنص التانى orders
معلش اصلى مثقفة شوية ولازم أتنك عليكم
وده بئا هو النوع الرابع : تناكة الثقافة
دى بجد بئا معاناة وكان لسة فى موقف قريب حصل معايا
هاحكيلكم عليه وادينا بندردش
ولا انتو زهقتوا لا سمح الله
خلاص خلاص هاكمل متزعلوش
المهم يعنى من حسن حظى طبعا
روحنا نزور ناس معرفة وابنهم فى كلية طب
ومن حسن حسن حظى بئا قعد يتكلم معايا عن كليته ودراسته
وقد ايه كلية طب دى كلية مفيش منها اتنين
وكأن باقى الكليات بتخرج سباكين مثلا
لحد هنا مكنش فى مشكلة وكنت مستحملاه
دخل بئا فى موضوع الشغل ولاقيته فجأة اتحول
وخد وضعه كده فى الكرسى واتنفخ مرة واحدة
وهو بيحاول يقنعنى ان اكتر الناس ثقافة هما الدكاترة
لانهم دايما بيقروا وبيطلعوا على الجديد
ده غير بئا نص كلامه مصطلحات طبية
بيقولها لى باللغة الانجليزية الفصحى
وعينكم ماتشوف الا النور بئا ..
مقدرتش استحمل اكتر من كده
تقريبا عقدت الواد فى عيشته
وخليته يكره اليوم اللى اتكلم معايا فيه
لانى ببساطة فهمته ان لما يحب يتكلم عن الثقافة
يتكلم عن مجالات تانية غير مجال دراسته
لان كل واحد فينا لو اتكلم فى مجال دراسته
هيبان بين الناس قارى وفاهم
يعنى لو قعدت اكلمه مثلا عن الهندسة والاتصالات
هعقده هو ودفعته كلها
وهايبئا قاعد ادامى زى كوز الدرة مش فاهم حاجة
لكن دى يبئا اسمها منظرة فارغة مش ثقافة
والحمدلله حط لسانه جوه بؤه
وريحنى من تناكته طول القعدة بعد كده
وبكده يا جماعة ابقى خلصت الاربع انواع بتوع التناكة
اللى انا اعرفهم طبعا
لو فى حد عنده نوع خامس او سادس ياريت يعرفنا بيه
علشان منتصدمش بيه فى الحقيقة
..
سؤال بئا على الماشى كده
تفتكر مين معانا فى المنتدى يطلق عليه لقب "تنك" ؟
ومحدش يطنش السؤال ده .. ماشى